Академич Х.Намсрай нь бүтэн жарны амьдралаа физик, математикийн шинжлэх ухаанд зориулсан дэлхийн энтэй эрдэмтэн бөгөөд “Бодисын тулгуур судалгаа ба шинжлэх ухаан, технологийн суурь мэдлэгийн үндсүүд” бүтээл нь дэлхийн олон орны ном, сэтгүүлд хэвлэгдэж, эрдэм шинжилгээний ажлын гол ишлэл болж, өндөр үнэлгээ авчээ. Онолын физикийн салбарт Намсрайн онол, Намсрайн дөхөлт, Намсрайн арга, Намсрайн схем, Намсрайн хязгаарлалт гэсэн нэр томъёо гарсан нь түүний бүтээлийг бүтээлийг дэлхийн мэргэжил нэгт эрдэмтэн, судлаачид нь хүлээн зөвшөөрч буйн илрэл болсон. Энэхүү бүтээлээрээ Шинжлэх ухаан, технологийн салбарын “Байгаль, нийгмийн ухааны шагнал”-ыг 2012 онд хүртжээ.

Академич Б.Бямбаа нь “Паразиттах өвчтэй малыг эмчлэх, сэргийлэх, дэвшилтэт технологи” судалгааны ажлын хүрээнд малын гадар, дотор паразитын эсрэг үйлчилгээтэй Авермонмек, цагаан хорхой туулгын Альмонзол бэлдмэлүүдийг гарган авч үйлдвэрлэлд нэвтрүүлжээ. Энэхүү цуврал технологиудаар үйлдвэрлэсэн тарилга, туулгын бэлдмэлүүд нь Монгол оронд гүйцэд танигдаж паразиттах өвчтэй малыг эмчлэх, сэргийлэх хэрэгцээг бүрэн хангаж, экспортыг орлож байгаа өндөр чанартай, үнэ хямд, хэрэгцээ ихтэй бүтээгдэхүүн болжээ.  

Авермонмек тарилгын, Альмонзол туулгын бэлдмэлүүдийг 2002-2018 онд үйлдвэрлэж, Монгол улсын мал эмнэлгийн хэрэгцээнд 273,6 тонн буюу 5,842,3 сая төгрөгийн бүтээгдэхүүн нийлүүлсэн нь гадаад орнуудын ижил төстэй бүтээгдэхүүн худалдан авах үнэтэй (153,294,4 сая) харьцуулахад даруй 147,4 тэрбум төгрөгийн үр ашгийг Монгол улсад өгсөн байна. Энэхүү бүтээлээрээ Шинжлэх ухаан, технологийн салбарын 2019 оны “Технологийн дэвшлийн шагнал”-ыг хүртжээ.

Химийн ухааны доктор, профессор Д.Дэмбэрэлнямба нь олон жилийн судалгааны ажлын үр дүнд орчин үеийн биотехнологи, биохимийн аргыг ашиглан монгол адууны ясны биологийн үнэт чанарыг хэвээр хадгалсан “Адууны яснаас гаргаж авсан кальцийн бэлдмэл”-ийг гарган авчээ.

Уг бүтээл нь хоёрдогч түүхий эд болох монгол адууны яс ашигласан экологийн цэвэр, импортыг орлох, экспортод чиглэсэн, анагаах чадвар сайтай, манай орны брэнд бүтээгдэхүүн болсон юм. Бусад кальцийн бэлдмэлүүдээс биологийн идэвхийн хувьд 3 дахин өндөр, ясны сийрэгжилтээс сэргийлэх болон нөхөн төлжүүлэх үйлчилгээтэй бөгөөд хүний биед зайлшгүй шаардлагатай олон төрлийн микроэлемент, эрдэс бодисоор давхар баяжуулсан зохистой найрлагатай болох нь лабораторийн судалгаагаар нотлогдсон байна. Энэхүү бүтээлээрээ Шинжлэх ухаан, технологийн салбарын 2015 оны “Технологийн дэвшлийн шагнал”-ыг хүртжээ.

Монгол Улсын төрийн шагналт, Химийн шинжлэх ухааны доктор, профессор, Академич Д.Батсүрэн 40 гаруй жил эрдэм шинжилгээ, судалгаа-туршилтын ажил эрхэлж, Монгол орны 50 шахам зүйл эмийн ургамлын химийн судалгаа явуулж, 300 гаруй цэвэр бодисыг таньж тодорхойлсны дотор шинжлэх ухаанд урьд өмнө нээгдээгүй байсан 37 байгалийн нэгдлийг олж тогтоожээ.

Дагуурын хүж өвс нэртэй ургамлаас 22 бодисыг цэврээр ялгаж, 7 шинэ бодисыг шинээр нээснээр байгалийн нэгдлийн химийн  шинжлэх ухааны хөгжилд үнэтэй хувь нэмэр оруулсан байна. Мөн энэ ургамлаас хорт хавдрыг эмчлэх, урьдчилан сэргийлэх идэвхтэй Дауринол хэмээх шинэ бодисыг гарган авч, бүтцийн органик хими, нанотехнологи, биотехнологийн салбарт шинэ нээлт хийсэн.

Инженер Н.Нацагнямын зохион бүтээсэн реактив чадлын автомат болох NaNyam-AX12 бүтээлийг бүх станц /дэд станцад суурилуулж, реактив чадлын асуудлаа шийдсэнээр эрчим хүчний систем ОХУ-аас салж, бие даан найдвартай тогтвортой ажиллах боломж нээгдсэн төдийгүй, эрчим хүчний систем янз бүрийн доргилт аваарын үед найдвартай ажиллах боломжтой болж байгаа бөгөөд олон тэрбум төгрөгний хэмнэлттэй ажиллах нөхцөл бүрдэнэ гэж үзсэн байна.

Тэрээр барууны технологийг өөрчилж, ашигтай загвар гаргасан бөгөөд өндөр үнэтэй хүчтэй хуучин тоноглолыг хэвээр нь үлдээж, түүнтэй хослуулсан нь технологийн дэвшил болжээ. Энэхүү бүтээлээрээ Шинжлэх ухаан, технологийн салбарын “Технологийн дэвшлийн шагнал”-ыг 2013 онд анхлан хүртжээ.